Nàutri, mèmbre dòu mouvemen moundiau pèr la proumoucioun de la lengo internaciounalo,adreissen aqueste manifèste à tóuti li gouvèr, à tóuti li ourganisacioun internaciounalo e à tóuti lis ome de bono voulounta, declaren noste prefound estacamen is óujeitiéu defini eici-dessouto, e counviden chasco individu à se joungne à nòstis esfors dins aquesto draio. Manda en 1887, coume proujèt de lengo aussiliàri pèr la coumunicacioun internaciounalo, l´Esperanto s´es rapidamen desvouloupa pèr deveni uno lengo vivanto, drudo de nuanço. Despièi mai d´un siècle, l´Esperanto founciouno e raproucho d´ome pèr dela li barriero lenguistico e culturalo.Entre-tèms, li óujeitiéu de si utilisaire an rèn perdu de soun impourtanço nimai de soun atualita. Ni l´utilisacioun au nivèu moundiau de quauco lengo nacionalo, ni lis avançado en matèri di teini de coumunicacioun, nimai l´envencioun de nouvelo metodo d´ensigna de lengo permetran pas de realisa li principe seguènt, que counsideren coume essenciau dins un ordre lenguisti juste e eficace. | |||||||||||||
|
DEMOUCRACIO Un sistèmo de coumunicacioun que privilegìo toujour certan ciéutaden, mai eisigis à d´àutri que counsenton d´annado d´esfors pèr ajougne un degrat mendre de coumpetènci, es foundamentalamen antidemoucrati.Bèn que l´Esperanto, coume touto lengo, fugue pas perfèt, despasso de liuen tóuti si rivau coume biais de coumunicacioun egalitàri à l´escalo moundialo. Afiermen que l´inegalita lenguistico entrino uno inegalita de coumunicacioun à tóuti li nivèu, au nivèu internaciounau coumprés. Sian un mouvemen favourable pèr uno coumunicacioun demoucratico. 
EDUCACIOUN TRASNACIOUNALO. | Tóuti li lengo etnico soun ligado à certano nacioun. Pèr eisèmple, l´escoulan qu´estudìo l´anglés descourbis tambèn la culturo, la geougrafìo e li sistèmo pouliti di païs anglofone, majamen dis Estat-Uni e dóu Reiaume-Uni.L´escoulan qu´estudìo l´Esperanto descurbis un mounde sènso frountiero ounte se sènt à l´oustau dins chasque païs. Afiermen que l´educacioun dins uno lengo, qunte que siegue, impauso uno certano visioun dóu mounde. Sian un mouvemen favourable pèr uno educacioun trasnaciounalo. 
EFICACITA PEDAGOUGICO | Soulamen un maigre pourcentage d´aquéli qu´estudìon uno lengo fourestiero la mestrejon veramen. Amé l´Esperanto, l´aquesecioun d´uno eisanço coumplèto es poussible, meme en autoudidacte. Diverso estùdi an mountra que l´Esperanto es utile coume preparacioun à l´aprendissage d´àutri lengo. A esta tambèn recoumanda coume elemen essenciau dins de cours de sensibilisacioun i lengo fourestiero. Afiermen que la dificulta di lengo etnico presentara toujour un empache pèr de noumbrous escoulan que tirarien pamens proufit de la couneissanço d´uno segoundo lengo.Sian un mouvemen favourable pèr un ensignamen eficace di lengo. 
PLURALENGUISME | La coumunauta esperantofone es uno di rare coumunauta lenguistico à l´escolo moundialo que tóuti si membre soun, sènso eicepcioun, bilengo o plurilengo. Chascun a fa proun d´esfors pèr aprendre au mens uno lengo fourestiero jusqu´à un nivèu sufisènt de coumunicacioun. Souvènti-fes, acò meno à la couneissènço e à l´amour de mai que d´uno lengo e, en generau, à un alargamen de l´ourizount persounau. Afiermen que li loucataire de tóuti li lengo - aquéli que soun forço espandido e aquéli que lou soun mens - devrien jouï d'uno vertadiero possibilita d'apprendre uno segoundo lengo e de l'utilisa coume biais de coumunicacioun à un aut nivèu. Sian un mouvemen favourable pèr l'autré d'aquesto poussibilita en tóuti. 
DRE LENGUISTI | La disparita dóu poudé dintre li lengo es de naturo à suscita uno coustanto insegurita lenguistico, enjusquo meme l'óupressioun dirèito amé la lengo pèr uno majo part de la poupulacioun moundialo.Dins la coumunauta esperantofone, que si lengo dóu brès siegon forço espandudo o noun, que siegon óuficialo o noun, tóuti li persouno se retroubon sus un terren nèutre gràci à la voulounta reciproco de realisa lou coumproumés.Un tau equilibre dintre li dre lenguisti e li respounsableta coustituïs un pont de couneigu pèr la recerco e l'avalouracioun d'àutri soulucioun à l'inegalita e i counflit linguisti. Afiermen que li disparita impourtanto di poudé entre li lengo minon li garantido -- esprimado dins tant de tèste internaciounau - d'egalita de tratamen sènso destincioun foundado sus la lengo. Sian un mouvemen favourable di dre lenguisti. 
DIVERSITA LENGUISTI | Li gouvèr natiounau tendon à trata la grando diversita di lengo dins lou mounde coume un oustacle à la coumunicacioun e au prougrès.Dins la coumunauta esperantofone, pamens, la diversita lenguistico es viscudo coume uno sourso permanènto e indispensablo d'enrichimen. Pièi, chasco lengo, coume touto espèci vivènto, es pourtarello de valour e digno de prouteicioun e de soustèn. Afiermen que li pouliti de coumunicacioun e de desvouloupamen, se soun pas foundado sus lou respèt e sus lou soustèn de tóuti li lengo, coundanon à mort la majourita di lengo dins lou mounde. Sian un mouvemen favourable pèr la diversita lenguistico. 
DESMANCIPACIOUN UMANO |
Chasco lengo deliéuro e entravo à la fès si usagié, en li dounant la poussibleta de coumunica entre éli, mai en li empachant la coumunicacioun amé d'àutri. Amagestra coume un biais de coumunicacioun universalamen acessible, l'Esperanto es un di grand proujèt desmancipacioun umano que founciouno - un proujèt destina à permetre à chasque ciéutaden de participa individualamen à la coumunauta umano, en counservant soun prefound enracinamen dins son identita culturalo e lenguistico propro, mai noun limita pèr aquest. Afiermen que l'usage esclusiéu di lengo naciounalo pauso inevitablamen de limito i liberta d'espressioun, de coumunicacioun e d'assouciacioun. Sian un mouvemen favourable pèr la desmancipacioun umano.
Traducioun d'Ugueto Vergier |
Laŭ la paĝoj, kaj kun kelkaj grafikaĵoj, originale ellaboritaj por la Manifesto de Prago fare de Franko Luin / 3 sep 1996 - 10 apr 2000